Bantala

Horeging bumi mbal-tumimbal,
sasat gawe uni manungsa kang kasrekal
Bumi langit gonjang-ganjing,
Anggonjing samubarang kang sarwa manjing
Bengkahing bantala,
jugruging wisma,
oncating nyawa, pratandha tekaning prahara ruhara
Prastawa kang yut-ginayut
agawe ati tansaya ciut
Apa bakal katekan ujare Mbah Buyut,
yenta bumi pertiwi bakal ambles?
Kahanan bakal nreces, teles, kebes kebak luh ludira kang nrewes
Ora, ora!!
Aja padha ndhredheg, aja padha mandheg!
Enggala ngadeg jejeg, nadyan pratala isih horeg
Aja kasigeg tandang gawemu
Ayo ngadeg, mbangun makarya
Linambaran donga
Mrih rahayuning bantala kisma

Dening: Sumaryono