Sekar Tengahan Pamiwaltung (Dening Sumaryono)

Kidung pangluwar
sakehing ribed bendu
kang krasa abot ing ati
temah pikir anglelara jiwa
kagubed ing peteng
ginubel ruraha
praharaning lampah-laku
nyandhet gawe mangu
ngruntik jro wardaya
kadyeku dadya
gawe mandheg bebayu
balung rinasa nglolosi
lungkrah lesu emeng jroning manah
mula sabisane
ngupayaa marga
bangkit ulah batin tuhu
kanthi niat estu
mangun luhur budya
titah cinipta
ginaris Gusti tuhu
abang-biru den lakoni
ireng putih denya linampahan
tumuju begjane
bisa antuk apa
bagya mulya apa tatu
nanging kabeh iku
yekti wus tinata
aywa angrasa
bisa mbengkas reretu
reregeding aji dhiri
tanpa adrenging krenteg jiwangga
sedya angluwarke
sagunging lelara
kang nyrimpet nyrimpung nyenyandhung
anggubel anggelung
asung panalangsa
pikir karasa
buneg buntu lan bingung
kabur kumleyang njalari
angga rusak kataman laranya
lah iku becike
padha wigatekna
tan piguna ngumbar pikir bingung
malah mangkin kuwur
temah lampus rasa

http://www.sastrajawa.com/sekar-tengahan-pamiwaltung-dening-sumaryono/