Sekar Tengahan Wirangrong (Dening Sumaryono)

Dhuh Gusti kang maha asih
lumunturna karahayon
mring titah paduka kang asampun
lirwa ing pakarti
supe myang suhing pranatan
pinangka pandaming gesang
dhuh Gusti kang maha suci
amba wus lumaku awon
nalisir saking pangreh rahayu
tan eling sagunging
dhendha donya lan delahan
kang tikel awrat kasandhang
suwunku mugya weh kardi
kinabulan rahmat onjo
kalis godha rencana reretu
reregeding pikir
tinangsulan tataharja
pinesu karya upaya
kidung wingit panglenggana
kocap katur dadya lakon
rinesep rumasuk sakalangkung
asung merbawani
laku jantrananing manungsa
mecaki lampahing gesang
dongaku karya sesuci
teges eling mring Hyang Manon
bakal dakpuja rinten lan dalu
dadya lakutami
sinartan tumindak nyata
ngenaki sabarang karya

http://www.sastrajawa.com/sekar-tengahan-wirangrong-dening-sumaryono/