Sekar Tengahan Balabak (Dening: Sumaryono)

Wong ngaurip elinga marang sadulur
nyatane
sira tan bakal bisa madeg sajuga
buktine
saben dina rinaketan mring sasama
titahe
yen rumangsa kepama sabarang butuh
pindhane
rajagung kang tumitah ing marcapada
kalane
ngegungke apa kang dadya darbekira
emane
lamun kepanjingan mulya mukti luhur
becike
enget lara lapane anggayuh karya
yektine
mukti wibawa dumunung aneng rasa
batine
balik yen sira kapacak dadya ajur
uripe
aywa karasa tinitah tanpa rowang
dadine
kinaweden mbacut laku nyambung dalan
critane
iku gegambaraning manungsa tuhu
pamrihe
datan lirwa marang uriping sasama
gunane
bareng rinangkulan mujudake karya
ujube

http://www.sastrajawa.com/sekar-tengahan-balabak-dening-sumaryono/